مكرونة بالصلصة و الزيتون

المقادير:
كيس مكرونة اسباجتى
كوب زيتون اسمر و اخضر
بصلة متوسطة
2 م زيت زيتون
ملح و فلفل
2 م صلصة و تلت كوب ماء

 (اوكوب عصير طماطم)
بقدونس للتزيين

الطريقة:

هتحطى زيت الزيتون و معاه البصل الشرائح
و اول ما يدبل هتحطى الصلصة و الماية (او عصير الطماطم)
و هتحطى ملحك و فلفلك و توطى النار لغاية ما الصلصة تتسبك
هتضيفى الزيتون و بعد خمس دقايق ضيفى المكرونة و كدة تمام
اغرفيها و زينيها بالبقدونس

اسيبكم مع صور الخطوات

كوكيز بالطحينة

كوكيز بالطحينة انا عارفة انها غريبة شوية بس النتيجة حلوة اوى انا اخدت الوصفة من فيديو موجود فى موقع مارثا ستيوارت  و طبقتها و بصراحة عجبتنى
دة كدة لينك الفيديو:
http://www.marthastewart.com/1007011/kitchen-wisdom?xsc=soc_fb2014414DessertdesA&#1064185

المقادير:

 بار من الزبدة 100جرام

كوب سكر بنى

كوب طحينة

كوب و نص دقيق

ربع م صغيرة ملح

و م صغيرة بيكنج صودا

بيضة و فانيليا

:الطريقة

هتضربى السكر مع الزبدة كويس جدا 

ثم الطحينة ( الطحينة حاولى متخديش الزيت اللى فوق الوش) و بعد كدة 

لما يتجانسوا هتحطى البيضة و الفانيليا

و تكونى طبعا ناخلة الدقيق و معاه الملح و البيكنج صودا و تحطيهم على الخليط 

و كدة تمام 

غطيها وحطيها فى التلاجة لمدة ساعة

 بعد كدة ب م الايس كريم تطلعى بولة و تكوريها بايديك و لو حسيتى ان العجينة ناشفة بللى ايدك خفييف اوى بالماية و كورى العجينة هتلاقيها طريت 

و حطيها على صانية متبطنة بورق الزبدة

و لو عايزاه بالسمسم

استخدمى سمسم مش محمص ابيض عادى و حطى الكورة فيها هيمسك السمسم فيها على طول

و هاتى شوكة اغمسيها بالدقيق و انطريها من الدقيق الزيادة و اضغطى على الكورة علشان يعمل الشكل اللى فى الصورة

تدخل الفرن على درجة حرارة 180

و لمدة عشر ل10 ل  12 دقيقة فقط 

و تستنى لما تبرد و تطلعيها من الصانية و بالف هنا

طريقة عمل بسكوت اليانسون

2 و نص دقيق 

كوب سكر

تلت كوب زيت

4 بيضات و فانيليا

م بيكنج بودر ص  مليانة

م يانسون كبيرة

 الخليط اللى هيتكون بيبقى اتقل من الكيك العادى و اخف من عجبنة الباستافلورا
 و علشان افرده كويس دهنت ايدى بنقطة زيت و ساوى السطح كويس
 علشان ينجح معاكى

تشيز كيك بالشيكولاتة و الكرامل

المقادير:

  لطبقة البسكوت  كوب

 و نص بسكوت مطحون ناعم + ربع كوب سكر ناعم

 + 50 جرام زبدة سايحة (ربع كوب)

  لطبقة التشيز كيك

 3 علبة زبادى حجم كبير معيار علبة الزبادى (يعنى احنا هنا هنستخدم نفس علبة الزبادى لكل المكونات الاخرى)

 3 كوب لبن بودرة

كوب و ربع سكر

 و كوب زيت (متنسوش بنعاير بعلبة الزبادى)

 للكرامل :

2 م سكر كباااار

 و نص كوب لبن و م قشطة كبيرة

 و م نشا صغيرة هندوبها فى 2 م لبن

 الشيكولاتة:  

2 م كاكاو و 2 م لبن بودر

  و 2 م سكر و نص كوب ماء

و م نشا صغيرة مدوبين فى 2 م لبن او ماء

   الطريقة :

 هتزودى الزبدة و السكر على البسكوت و تقلبيهم كويس و تفرديهم فى صانية التشييز كيك

 و فى الخلاط او الفود بروسيسور هتخلطى المكونات كلها مع بعض  

 و حطيهم برااحة على البسكوت

 و دخليها الفرن ربع ساعة على درجة حرارة 180

  او اول ما الجناب تاخد لون دهبى

  سيبيها تبرد و فى الوقت اللى هى فيه فى الفرن اعملى صوص الكرامل و صوص الشيكولااتة

 الكرامل

 هتكرملى السكر و اول ما يغمق وطى النار و حطى اللبن براحة (خدى بالك بيفور مرة واحدة و هتلاقى السكر مسك) قلبيهم لغاية ما السكر يدوب تماما و اول ما يغلى انزلى بالنشا و بعدها مباشرا م القشطة و طفى علييه

   و صوص الشيكولاتة

 نفس الكلام بتحطى المكونات كلها على النار و اول ما يغلوا تنزلى بالنشا و تقليبة واحدة و تتطفى ( ممكن بعد ما تطفى تزودى مكعبين شيكولاتة و م زبدة صغيرة لاعطاء الصوص لمعان و نكهة الشيكولاته المفضلة عندك )

 و بس يا قمراية بعد ما التشيز كيك تهدى كدة تصبى عليها صوص الكرامل طبقة خفيفة و رفيعة و تدخليها التلاجة تمسك شوية و بعد كدة زوقيها بصوص الشيكولاتة زى ما تحبى   ملحوظة ممكت تستخدمى طريقتك الخاصة فى عمل الكرامل و صوص الشيكولاتة و ممكن كمان تجيبيهم جاهزين للسهولة و توفير الوقت

كب كيك الشيكولاتة

كب كيك برقائق الشيكولاتة 

المقادير :

2 بيضة رشة فانيليا 

كوب الا ربع سكر 

2 م  ك سمن

نص كوب لبن

كوب دقيق + 2 م ص بيكنج بودر

ربع كوب كااكاو

 نص كوب من رقائق الشيكولاتة

الطريقة:

هتشغلى الفرن و تدهنى صانية الكب كيك

فى الخلاط او بمضرب البيض 

هتضربى البيض مع الفانيليا حتى يتضاعف حجم البيض 

ثم ضيفى السكر و اضربيهم حتى يبيض الخليط و يتضاعف 

ثم السمن 

ثم اللبن و المواد الجافة بالتناوب (الدقيق +البيكنج بودر + الكاكاو بتنخليهم مع بعض)

ضعى نص كمية الرقائق و قلبيهم ب ملعقة 

ضعيهم فى صانية الكب كيك و ضعى باقى الرقائق فوق الوش

دخليهم الفرن على حرارة 180 لمدة ساعة الا ربع او نص ساعة حسب فرنك

اتركيهم ليبردوا ثم اخرجيهم من القوالب و يقدموا بالف هنا

طريقة عمل الحواوشى

المقادير:

3 كوب دقيق
ربع كوب زيت زيتون
كوب ماء
م خميرة كبيرة +م سكر
رشة ملح
2 م زبادى

للحشو:
عصاج (لحمة معصجة) و بقدونس و فلفل اخضر مقطع صغير

الطريقة:

هتحطى 2 كوب دقيق و معاه رشة الملح و السكر و الخميرة الفورية
و تقلبيهم كويس
هتضيفى الزيت و الزبادى
و تعجنى كويس
و تبداى تحطى الماية هتلاقى العجينة طبعا لازقة جدا فى ايديك
هتستمرى فى العجن مع وضع كوب الدقيق التالت جزء جزء حتى تنفصل العجينة من ايديك تماما
هتسيبى العجينة تخمر ساعة
و تفرديها بالنشابة و على شكل دائرى....انا بفردها و بعد كدة استخدم طبق دائرى علشان يطلعوا كلهم نفس الحجم و الشكل

و تحطى فى نص الاول للعجينة الحشو و تقفلى عليها بالنص التانى
و تحكمى غلق الاطراف (باستخدام الماية بللى ايديك على خفيف و ابدأى اقفلى الاطراف كويس


للوجه ممكن تستخدمى بيضة مخفوقة جيدا او لبن
و ترشى سمسم او حبة البركة
سيبيها دقايق ترتاح
و دخليها فرن حامى فى الوسط حتى يتغير لونها للون الدهبى و بالف هنا و شفا

خبز بالتوم

النهاردة وصفتنا اكيد الكل بيحبها و اول حاجة بتمدى ايديك عليها و خصوصا من بيتزا هت
انا عن نفسى بعشقها جدا
الخبز بالتوم بطريقة مميزة جدا و نفس طعم الجاهز تماما

المقادير:
 خبز باجيت ( و ممكن تستخدمى العادى )

3 فصوص توم طااازة و مفروم جيدا
2 م زبدة
بقدونس ناشف او بقدونس طازة مغسول ومتصفى جيدا و مقطع صغييييير جدا

جبنة موتزاريلا و ممكن نستخدم معاها لو عندك بارميزان

الطريقة
هتقطعى الرغيف بالورب (بميل)
و تفرديه على ورق زبدة
فى طبق (بولة صغيرة) هتحطى الزبدة السايحة و التوم المفروم و البقدونس
و بفرشاه هتدهنى على كل قطعة بالخليط السابق
و تحطى على كل واحدة جبنة موتزاريلا او خليط منها و من البارميزان (او الجنبة التركى)

هتكونى مشغلة الفرن على نار متوسطة و تدخلى الصانية لمدة خمس دقايق او اول ما الجبنة تسييح

جربوها و قولولى اييه رأيكم

طريقة عمل المحشى

لعمل حلة صغيرة

كوب ارز
حزمة بقدونس ..شبت ...كسبرة
اقل من ربع كوب زيت
طماطمية
بصلاية
2 م صلصة
ملح و فلفل

كوب و نص شوربة جاهزة

الطريقة:

هتغسلى الارز كويس و تصفيه و تحطيه فى بولة و معاها البصلة المفرومة و الطماطم كمان تكون مفرومة و الصلصة و الخضرة تكون متطعة صغير جدا و الزيت  و الملح و الفلفل و تقلبيعم كويس جدااااا
و تبدأى تحشى  لو فيه ورق اخضر بتحشيه الاول و تحطيه فى قعر الحلة
و بعد كدة الورق الفاتح

بعد ما تخلصى تكونى غالية الشوربة و تحطيها على المحشى و تغطى علييه
و شوية و توطى النار خالص كأنك بتعملى ارز عادى و سبييه يستوى

هتعرفى انه استوى انك تخدى واحدة و تدوقيها او بشوكة تقطعيها  و تلاقيها بتتقطع معاكى
و بالف هنا و شفا

صدور دجاج بحشو الموتزاريلا

فراخ بحشو الموتزاريلا

https://www.facebook.com/shatrawlahloba

المقادير:

صدور فراخ كاملة بعدد افراد الاسرة
ملح و فلفل
بطاطس و بصل مقطعين مكعبات
م زبدة صغيرة ل كل صدر فرخة

شوية زيت زيتون
بقدونس ناشف للتزين و طبعا بيدى طعم جميل اوى
كمية من الموتزاريلا المبشورة

الطريقة:

هتجيبى صدر الفرخة و بسكينة من الجزء العالى بتعها تعملى فاتحة و تحاولى تعمقيها بالسكينة من غير تكبرى الفتحة  و من غير ما تخرجى السكينة خارج الفراخ
احنا هنحشيها زى ما بنحشى الكوسة او البتنجان  الرفيع

كدة هنضمن ان الجبنة مش هتطلع برة (عكس طريقة قتح الصدور زى الساندوتش فى طريقة عمل الكوردن بلو
https://www.facebook.com/media/set/?set=a.569259343130100.1073741882.158394784216560&type=3 )

هتحشى الفراخ كويس بالجبنة و بعود خشب هتقفلي الفتحة كويس

فى طاسة تكفى عدد الصدور هتحطى الزبدة و زيت الزيتون و اول ما يسخنوا تنزلى بالفراخ تتحمر كويس من الجهتين
و معاهم البطاطس و البصل

و ترشى ملح و فلفل و اول ما كل حاجة تتحمر توطى النار و تغطى على الطاسة لمدة نص ساعة

و تقدم بالف هنا مع رشة من البقدونس المفروم الناشف او الطازة اللى متوفر عندك

طريقة عمل الجمبرى المشوى

المقادير:
نص كيلو جمبرى مقشر كبيرة
4 فصوص توم كباار مفرومين
ليمونة و 2 م خل
م ملح و م كمون و نص م شطة
للشيش طاووك طماطم و فلفل اخضر و بصل مقطعين مكعبات

الطريقة:
هتبلى الجمبرى بالتتبيلة السابقة و تضعى معهم البصل و الفلفل و الطماطم
و تسيبيهم تلات ساعات على الاقل فى التلاجة

وقت الشوى يوضع الفلفل و الطماطم و البصل و الجمبرى فى اسياخ الشوى و يشوى على الجريل او فى الفرن

و يقدم و بالف هنا

فروت سلاد

الفاكهة عمرها متقول لا فى  اى وقت لو عطشانة او جعانة عندك ضيووف و كفاية الوانها اللى تفتح النفس
فرود سالاد من الفراولة و الكيوى و البرقوق و الخوخ
و 2 م سكر كبار و شوية ماية

سجق بالفلفل و الطماطم

السجق من الاكلات السريعة جدا و اللى مش بتاخد وقت
و الطريقة دى ممكن تتاكل سندوتشات او مع مكرونة او حتى ارز بالشعرية

المقادير:
نص ك سدق
فلفل الوان و اخضر مقطعين
طماطماية
بصلة كبيرة مقطعة شرائح
رشة ملح و فلفل
و نقطتين زيت زيتون

الطريقة:
هتشوحى البصلة و شوية و تحطى الفلفل الالوان و الطماطم
و السجق المقطع و الملح و فلفل و تغطى عليهم و تسيبيهم يستوى و السجق ينزل مايته و بالف هنا 

تارت المربى

المقادير:


مقادير التارت:

2 كوب دقيق
رشة ملح
ربع كوب سكر بودر
بيضة
100 جرام زبدة مقطعة و من التلاجة
فانيليا


باقى المكونات
كاسترد (2 كوب لبن و 2 م كاستر مدوبيبن فى نص كوب لبن و 2 م سكر )
جيلى استخدمى كوب و نص فقط
علبة كريم شانتيه و اضربيهم مع ربع كوب لبن ساقع

كل دول هتعمليهم قبل ما تعملى التارت

الطريقة

هتحطى السكر و الملح و الدقيق فى الفود بروسيسور اخلطيهم لكى يتجانسوا
ضيفى مكعبات الزبدة مع استخدام البلسات علشان يتكون عندك دقيق مرمل
ضيفى البيضة و الفانيليا و هتلاقيهم اتجمعوا كلهم
حطيهم فى كيس و فى التلاجة لمدة ساعة
افرديهم على ورق زبدة
و حطيها فى قالب التارت و بشوكة خرمى العجينة علشان مترتفعش
و ممكن تستخدمى البقول على ورقة زبدة

هتدخل الفرن طبعا مشغلينوا مسبقا و على نار 200 درجة
حتى يصبح لونه دهبى

اخلطى بعد ما يبردوا تماما الكريم شانتيه مع الكاسترد

و ضيفى الخليط فوق التارت و رصى الفراولة او اى فاكهة تحبيها
و الجيلى اللى هترصيه يكون ماسك نفسه مش سائل بحيث لما تحطيه ما ينزلش كله من فوق الفراولة

باقى العجينة عملت بيها مينى تارت المربى استخدمت مربى تين و مربى مشمش
ووباقى العجينة فوق التارت و دخلتهم الفرن

Like · Comment

74

فراخ بصوص الصويا

فراخ بصوص الصويا و الصلصة..و ارز بسمتى 

المقادير:

صدرين مخليين و مقطعين شرائح صغيرة

ملح و فلفل و جنزبيل و 4 م صوص صويا 

حبهان و حبوب الخردل (ان و جدت) او م مستردة

2 ثمرة فلفل اخضر ,,, بصلة متوسطة مقطعين شرائح

م صلصة كبيرة و ربع كوب ماء او ربع كوب عصير طماطم 

هتتبلى الفراخ جيدا و تترك ساعة ل اكتر فى التلاجة

فى 2 م زيت زيتون هتنزلى بالفراخ الاول تاخد لون 

ثم البصل و الفلفل و توطى عليهم و اول ما البصلة و الفلفل يدبلوا هتزودى م الصلصة و ربع كوب ماء و تقلبى كويس و تغطى عليهم و تسيبيهم يستوى على نار هادية

الارز

كوب ارز بسمتى و كوب شوربة

زبيب 

ملح و قرفة و جنزبيل و بهارات و قرنفل

انا كان عندى نص كوب بهريز من الفراخ بدبس الرمان فى الفرن استخدمتهم مع نص كوب ماء و قرفة و بهارات و قرنفل

الطريقة 

فى حلة ضيفى الشوربة و البهارات و الزبيب

و اول ما يغلوا ضيفى الارز و كملى زى ما متعودة

الفراخ بتتبيلة الروز مارى

دى صورة الفراخ بتتبيلة الروز مارى قبل دخولها الفرن

المقادير تبلى الفرخة بالاتى بصلة مقطعة شرائح م ملح 

م فلفل 

م جنزبيل

3 م رووز ماااارى

و ليمونة و فصين توم .

..احشي ما بين الجلد و من جواها و اقفليها و سيبيها ساعة فى التلاجة على الاقل . 

دخليها الفرن ساعة النار من تحت بس و نص ساعة النار من فوق و تحت لو فرنك كهربا ....لو فرن بوتجاز يبقى هتاخد ساعة و نص و لو متحمرش ولعى الشواية خمس دقايق و تقدم بالف هنا

https://www.facebook.com/shatrawlahloba

الطريقة الصحيحة للحفاظ على التوم و البصل البودر

فييه كتير من اللهلوبات بدأت تستخدم التوم و البصل البودر و بعد فترة بتلاقيه نشف و حجر و مبتعرفش تطلعه من البرطمان .....
...علشان تحفظى على التوم و البصل البودر حطى البرطمان فى التلاجة و بكدة هتحفظى عليهم اطول فترة ممكنة

مقلوبة الباذنجان

\

بسم الله الرحمن الرحيم نبدأ بالمقادير


مقاديرى لعدد فردين او حلة صغيرة 

ثمرة باذنجان كبيييرة (او اتنين متوسطتين)
5 قطع لحمة حجم كبير (هتقطعيهم قطع صغيرة )
بصلة متوسطة للحمة مفرومة
كوب ازر 
بصلة متوسطة مقطعة شرائح (ممكن تستخدمى طماطم شرائح ايضا)
ملح و فلفل و بهار لحمة و كركم و حبهان و جنزبيل
كمية من الماء المغلى لسلق اللحمة

الطريقة:

هتسلقى اللحمة كالمعتاد مع اضافة البصلة المبشورة و البهارات ما عدا الكركم 
طريقتى فى سلق اللحمة

نضع الماء يغلى ثم اضع اللحمة و لو فييه ريم اشيله و بعد كدة البصلة و الملح و باقى البهارات و اسيبهاتستوى
بعد ما اللحمة تستوى هتشيليها من الشربة اللى اتكونت عندك 
و بعد كدة قشرى الباذنجان و قطعييه شرائح و حمرييه فى شوية زيت صغيرين فى طاسة ...ممكن فى الفرن مع مسحه بالزيت علشان الباذنجان بيشرب الزيت بسرعة 
و هنبدأ نشتغل 
اولا نضع البصلة و الطماطم الشرائح و بعد كدة رصى الباذنجان زى ما تحبيه طبقة او طبقتين و ممكن على جناب اللحلة
ممكن كمان بين الارز
ثم اللحمة ثم ضعى الارز المغسول جيدا و مصفى جيدا
فى الوقت دة تغلى الشربة و تحطي معاها الكركم و تنزليها براحة على الارز بدون اضافة زيت او سمن علشان الشربة مش محتاجة و تستنى لما تغلى و يبدأ الارز يتشربها و وطى النار و سويها زى اى ارز عادى بس طبعا من غير ما تقلبييه او ممكن بعد فترة تقلببيه براحة من فوق الوش من غير ما توصلى للحمة ...
بس يا سكرة و وقت التقديم تقلبيها فى طبق التقديم و تزين 

بيتزا السوسيس

لعمل 2 صانية (الصانية تكفى فرد)
كوب دقيق و نص كوب اخر للم العجينة
م خميرة + م سكر + ربع كوب ماء ....لتخمير العجينة
ربع كوب او اكتر شوية ماء للعجن
م زبادى كبيرة
2 م زيت زيتون و رشة زعتر

هتخلطى المقادير جيدا فى بولة
هتكون ملزقة جامد علشان محتاجة دقيق
ف استخدمى ملعقة خشب فى العجن او العجانة 
و تتركيها تخمر فى مكان دافى 
و بعد نص ساعة ل ساعة
ضيفى عليها نص كوب دقيق و لمى العجينة بيها ( الافضل تشتغلى على الرخامة على طول)و تفرديها هتتفرد معاكى على طول 
فى الصوانى مدهونة بزيت 
تدهنى فوقيها كاتشب 
ثم الزيتون و الفلفل و الطماطم و السوسيس و تتركيها تلت ساعة تخمر مرة اخرى و تدخليها فرن حامى من تحت حتى تستوى و بالف هنا

كب كيك النوتيلا

المقادير:
2 بيضة كبار و فانيليا 
ربع كوب سمن 
نص كوب لبن
كوب الا ربع سكر
كوب و ربع دقيق + 2 م بيكنج بودر (منخوليين)
نوتيللااااااااااا :)

الطريقة
هتضربى البيض كويس جدااااا مع افانيليا لغاية ما حجم البيض يتضاعف
ضيفى السكر و السمن حتى يصبح الخليط لونه ابيض 
ضيفى اللبن بالتبادل مع الدقيق و ال ب ب 
ادهنى صانية بالسمن 
هتقسمى الخليط ل تلت و تلتين 
التلتين هتحطيهم فى قوالب الكب كيك 
ثم ب م نضيف م نوتيلا على الخليط 
ثم باقى الخليط( غالبا ملعقتين ل كل قالب كب
( لافضل نتائج اشتغلى بسرعة و تكونى محضرة كل 
حاجة علشان النوتيلا متنزلش القاع ) 
بقمع التشكيل ابدأى زوقى الكب كيك من فوق بالنوتيلا (دة اختيارى لو مش عايزة التزويق اللى فوق الوش)
طبعا الفرن هيكون سخن و على درجة حرارة 180 و سويه زى ما متعودة غالبا نص ساعة