فلافل (طعمية)

المقادير:

ملحوظة المقادير دى لكمية قليلة تكفى فردين لمدة يومين او تلاتة تقدرى تزودى المقادير برحتك

2 كوب فول مدشوش(اللى من غير قشر)
بصلة صغيرة

حزمة بقدونس

بصل اخضر (اختيارى) يعنى لو مش عندك مش مشكلة

حزمة كرات صغيرة  ( انا  ملقتش هنا كرات مصرى فا محتطتش)

4 فصوص توم كبار 

م كسبرة ناشفة و م شمر 

ملح و رشة شطة

للقلى:
بيكربونات و سمسم و زيت للقلى

الطريقة:

هتنقعى الفول ليوميين بعد غسله جيدا
فى المفرمة او الفوود بروسيسر

او الكبة ...انا استخدمت الكبة بس الاحسن المفرمة

هتفرمى الفول و البصل و البقدونس و التوم و الكرات لوحدهم الاول 

هتعيدى فرم المكونات بس هنضيف معاهم الملح و الشطة و الكسبرة و الشمر

و هتعيدى الفرم مرة اخيرى حتى تحصلى على عجينة نعمة جدا 

كدة حصلتى على عجينة الفلافل

 وقت القلى هتضيفى رشة بيكربونات صغيرة جدا جدا على الكمية اللى هتقليها و بتجربى تقلى واحدة الاول لو نسبة البيكرونات كتير هتلاقيها فكت من بعضها لو نسبة البيكربونات قليلة هتلاقيها مكتومة من جوة 

و فى طبق حطى شوية سمسم و تدهنى ايدك زيت و تحطيها على السمسم هيمسك فى ايديك 

هتخدى قطعة عجينة بايديك ف السمسم هيمسك فيها و تحطيها فى الزيت 

خليكى سريعة و حطى اكتر من واحدة و قلبيهم على طول كل شوية علشان تستوى من جوة و تقرمش من برة 

تقدرى تشيلى باقى العجينة فى علبة فى الفريزر او فى اكياس و تستخدميها فى اى وقت