الخميس، 16 مايو، 2013

سينابون رولز



المقادير 
5 كوب دقيق منخووول
نص كوب سكر
كوب الا ربع زبدة تكون ماسكة نفسها (مش سايحة اوى و مش جامدة اوى
كوب لبن دافى مايل للسخونية
بيضة و رشة فانيليا
م كبيرة خميرة فورية

الحشو:
زبدة و سكر و قرفة ( و كاكاو اختيارى)
الكمية حسب الرغبة

بتحطى الزبدة و عليها السكر و تذوبيهم باللبن الساخن

هنضيف بيضة و فانيليا 
البيضة هنا مجرد تعمل لون و طعم حلو للعجينة

و بعد ما كل حاجة تجانست بنضييف الخميرة
ثم نضيف الدقيق دفعات مع التقليب المستمر

و بعد وضع كل الدقيق بتعجنيها ب ايديك على الرخامة بشوية دقيق تحتها
و تسيبيها تخمر ساعتين

 بعد ساعتين هبدأ افردها
العجينة بتكون طرية و فى نفس الوقت مش بتمسك فى ايديك
و فردها بيكون سهل اوى اوى

هنفردها على شكل مستطيل و حاولى تكونى مساوية الاطراف .....
(((اوعى تعمليها زيى :)) مش مظبوطة كدة .. معلش الاستعجال بقى )))

هنا دهنا العجينة كلها بالزبدة ( علشان تمسك الحشو )
والسكر و القرفة (انا بزود كاكاو)
الكمية حسب الرغبة بس الافضل تبقى كتيير

و ابدا الفها .....
طبعا لو الاطراف مظبوطة مكنش الطرف بقى شكله كدة

اهم حاجة هنا انك تتأكدى ان الاطراف ماسكة فى العجينة كويس بالضغط الخففيف عليها

و ابدأى قطعيها بسكينة حاادة

و بطول مش صغير (ممكن تحسى انك بتقطعيها كبير بس خدى بالك انها هتخمر مرة تانية و هتنفش (فا لازم الطول يكون اطول من سمكها )

و ادهنى الصانية و افردى السينابون بس بعيييد عن بعضها

هنا لما خمرت (بتسبيها ساعة او ساعة و نص تخمر بعد رصها فى الصوانى)


الكرامل:
اى كمية من السكر يا دوبك لونها يغمق على النار و تضيفى عليها قشطة ....و افضلى قلبيها لغاية ما يتكون عندك الصوص

الصوص الابيض عبارة عن حليب مكثف محلى  ممكن تستخدمييه كدة او تزودى علييه 2 ل3  قطع جبنة كيرى فى الخلاط..

انا بحط على النار كوب لبن بدرة مع كزب سكر و كوب مااء و اسيبهم يغلوا على نار هادية يعنى تظبطى النار بحيث يغلوا مش جامد علشان ميتحرقش و اول ما يقل نصه يبقى كدة الصوص جاهز

ليست هناك تعليقات:

إرسال تعليق