الأحد، 24 فبراير، 2013

الحواوشي ( العيش باللحمة )


المقادير:

3 كوب دقيق
1/4 كوب زيت
1/2 معلقة بكينج بودر
1ونص معلقة كبيرة خميرة فورية
1/2 علبة زبادي
1 معلقة سكر
1/2 معلقة ملح
كوب الا شوية صغيرين ماء و لبن
مقادير الحشوة:
1/2 كيلو لحمة مفرومة وتبشري عليها 2 بصلة متوسطة وملح وفلفل واي بهارات تحبيها وفلفل اخضر وطماطم مكعبات وتقلبيهم علي بعض وانا حطيت فتافيت لية صغيرة بتدي طعم جميل للحمة

الطريقة:

بنحط الدقيق وننخله والبكينج بودر والخميرة والملح والسكر
وبعدين نحط عليهم الزبادي والزيت ونفركهم كويس وبعدين نحط الماء واللبن شوية شوية لغاية العجينة متتلم معاكي
 .. حتلقيها ملصقة في ايديكي بسيط تحطي رشة دقيق ومتكتريش عشان متنشفش منك .. وتفضلي تعجني لحد متحسي انها بقت طرية في ايديك سبيها تخمر ساعة او ساعة ونص في مكان دافئ ..
 انا ولعت الفرن ثواني وطفيته علي طول وغطيتها بفوطة وسبتها جواه خلال نص ساعة هتلاقيها خمرت وعليت معاكي ..
قسميها 4 قطع عشان المقدار هيعمل رغيفين كبار
 وبعدين تحطي دقيق من تحت العجينة وفوقها وتفرديها بالنشابة علي شكل دائرة وتفردي الحشو عليها وبعدين تفردي قطعة عجينة اخري بالنشابة وحطيها فوق الحشوة
يعني يبقي رغيف من تحت وبعدين الحشوة وبعدين رغيف من فوق وتقفليها وتضغطي علي الطرف علشان ميفتحش منك وتدهنيها بصفار بيضة وممكن تحطي عليها من فوق سمسم او حبة البركة او سماق
 وطبعا الفرن يبقي والع من البداية
وتدخليها علي حرارة من 180 ل 200 لغاية متحمر بتاخد حوالي من 25 ل 30 دقيقة .. والف هنا وشفا

ليست هناك تعليقات:

إرسال تعليق