الأحد، 24 فبراير، 2013

جيب التاجر



دي اكلة جامدة اخر 3 او 4 حاجات كدة هههههه اسمها جيب التاجر وفي ناس بيسموها فم السمكة


المقادير:

توست ابيض
طبعا الحشوة دي بتبقي حسب رغبتك انتي ممكن تحشيها اللي انتي عايزاه بس انا استخدمت الحشوة دي:
فراخ بانية مقطعة شرائح رفيعة زي الشاورمة
1 بصلة مبشورة
2 فص ثوم مقطع صغير
2 ملعقة زبدة كبير
فلفل اخضر
ملح وفلفل اسود
خس ونقطتين ليمون
2 ملعقة مايونيز كبيرة
للقلي:
بيض ولبن وبقسماط وزيت


الطريقة:

بتحطي 2 توست فوق بعض وتفرديهم بالنشابة وبأي قطاعة مدورة عندك او كوباية تقطعيها عشان تبقي مدورة وتشيلي الحروف البني هيبقي شكلها عامل زي القطايف كده
 وبعدين تحطيها في بيض ولبن وبعدين بقسماط وبعدين تقليها في الزيت

اهم حاجة انك تحطيها في البيض واللبن وتشليها بسرعة علشان التوست ميشربش البيض..
 بعد متحطيها في الزيت بثواني هتلاقيها نفشت تروحي قلبها علي الناحية التانية وثواني وتطلعيها علي منشفة ( مناديل )
مع انها مش مستهلة اوي يعني لأنها مش بتشرب زيت وشكلها وكأنك مطلعاها علي مناديل
.. تسبيها تهدي شوية وبعدين ابقي افتحيها بس مش للآخرعشان تبقي عاملة زي الساندويتش

نيجي بقة للحشوة
تحطي علي النار الزبدة وبعدين تشوحي فيها البصلة وبعدين تنزلي الثوم وبعدين شرائح الفراخ وتقلبي
وبعدين تنزلي الفلفل الاخضر وبعدين الملح والفلفل الاسود
 وتقلبي لغاية الفراخ لونها مايتغير وتستوي خالص تطفي النار وتحطي معلقتين المايونيز ونقطتين الليمون وتقلبي
كده كله جاهز ...
 افتحي جيب التاجر ( الساندويتش ) وحطي فيه الخس وبعدين الحشوة.. وكلوا وادعولي ..تحـــــفة وحلوة في العزومات واعياد الميلاد كبديل للسندويتشات شكلها اشيك وطعمها احلي 
...كأنك بتكلي ساندويتش من برة ... وبالهنا والشفا

ليست هناك تعليقات:

إرسال تعليق